Tenzas, xestión forestal Enxeñaría do medio natural e asesoramento legal

02 · Servizos

Propietarios forestais

Ordenamos, cortamos, certificamos e regularizamos fincas forestais de propietarios particulares en Galicia e Asturias, tamén cando o propietario vive lonxe e herdou o monte sen saber moi ben que ten. Enxeñeiros forestais e unha licenciada en Dereito no mesmo equipo, desde Lugo.

Carballeira galaico-portuguesa co sotobosque limpo no monte de Raño

Que resolvemos

Sacarlle partido a unha finca sen se perder nos trámites

Unha finca forestal dá madeira, axudas e ás veces problemas. Estes son os encargos habituais dun propietario particular.

Plan de xestión ou modelo silvícola

Un documento sinxelo que di que tes e que vas facer con iso. Segundo a superficie, redáctase un plan propio ou abonda con adherirse a un modelo silvícola aprobado pola Xunta.

  • Inventario e cartografía da finca.
  • Redacción do plan ou adhesión ao modelo silvícola.
  • Tramitación electrónica e revisións.

Permisos e comunicacións de corta

Antes de que entre unha motoserra hai un trámite. Preparámolo, presentámolo e dicímosche cando se pode cortar.

  • Autorización ou declaración responsable, segundo o caso.
  • Comprobación de afeccións: faixas, leitos, espazos protexidos.
  • Presentación electrónica ante a Xunta.

Venda de madeira e control da corta

Medir antes de vender e vixiar mentres se corta. É a diferenza entre cobrar o que hai e cobrar o que din que hai.

  • Sinalamento e cubicación do lote.
  • Ofertas de varias empresas coa documentación validada.
  • Control da corta e liquidación.

Certificación FSC® e PEFC en grupo

Un certificado propio é caro para unha finca soa. No grupo «Propietarios das Mariñas», que xestiona Tenzas, o custo repártese entre miles de propietarios e comunidades.

Catastro e referencias catastrais

Moitas fincas están mal debuxadas, a nome de quen xa non está ou repartidas en referencias que ninguén localiza. Poñémolo en orde.

  • Localización de parcelas a partir de escrituras ou referencias.
  • Levantamento topográfico e planos.
  • Emendas e alteracións catastrais.

Herdanzas, agrupación de parcelas e permutas

Herdar monte adoita ser herdar parcelas pequenas, dispersas e a medias con irmáns. Axudamos a ordenar a propiedade para que se poida xestionar.

  • Identificación e valoración das fincas herdadas.
  • Agrupación de parcelas e permutas con estremeiros.
  • Documentación técnica para notaría e rexistro.

Plantacións e axudas á forestación

Elixir a especie que vai funcionar nese solo e buscar a axuda que a financia. Despois, dirixir a plantación para que se faga como se proxectou.

  • Proxecto de plantación e elección de especies.
  • Solicitude e xustificación de axudas da Xunta e da Unión Europea.
  • Dirección de obra e seguimento.

Defensa xurídica da finca

Ocupacións, camiños que atravesan a parcela, servidumes de paso ou de liñas, expropiacións: antes de asinar ou de se resignar, convén saber que dereitos tes.

  • Ocupacións e conflitos de lindes.
  • Servidumes, expropiacións e ocupacións temporais.
  • Informe técnico e defensa xurídica co mesmo equipo.

Como traballamos

Catro pasos, tamén a distancia

Boa parte dos nosos propietarios viven fóra de Galicia. O traballo organízase para que non teñas que vir cada vez que hai que asinar algo.

  1. Localizar e diagnosticar

    Coas túas referencias catastrais ou os papeis da herdanza, situamos as parcelas, visitámolas e contámosche que hai e en que estado.

  2. Proposta con prezo pechado

    Que convén facer, en que orde, canto custa e que axudas hai. Por escrito, sen compromiso.

  3. Execución técnica e xurídica

    Plan, permisos, venda de madeira, plantación, catastro ou defensa: o que toque, cun interlocutor único.

  4. Seguimento e área do cliente

    Segues as túas parcelas e os teus expedientes desde o móbil en xestion.tenzas.es, e avisamos de prazos e revisións.

Área do cliente

As túas parcelas, desde calquera sitio

Cada propietario ten o seu espazo en liña: as parcelas sobre ortofoto e catastro, coas ortofotos históricas desde 1956 para ver como cambiou a finca; os expedientes de corta, plantación ou certificación co seu estado e os seus documentos; e planos A4 e A3 listos para levar á notaría ou ao concello. Tamén se descarga todo en GeoJSON, KML e GPX.

Entrar na área do cliente Pedir acceso

Preguntas frecuentes

O que nos preguntan os propietarios

Vivo fóra de Galicia e herdei unhas fincas. Por onde empezo?

Por saber que tes. Coas referencias catastrais ou os datos da herdanza localizamos as parcelas, comprobamos en que estado están e dicímosche se convén ordenalas, cortar, plantar ou simplemente regularizalas. Todo se pode facer a distancia, coa área do cliente e unha visita nosa ao terreo.

Necesito un permiso para cortar?

En Galicia, as cortas en montes privados tramítanse ante a Xunta por vía electrónica, mediante autorización ou declaración responsable segundo o caso. Nós preparamos a solicitude, presentámola e dicímosche cando podes cortar.

Como sei se me pagan ben a madeira?

Medindo antes de vender. Cubicamos o lote, pedímoslles ofertas a varias empresas coa documentación validada e comparamos prezo e condicións. Despois controlamos a corta para que se saque o que se pagou e nada máis.

Paga a pena certificar unha finca pequena?

En grupo, si. Tenzas xestiona o grupo de certificación FSC® e PEFC «Propietarios das Mariñas», con máis de 5.200 membros. O custo repártese, a oficina central leva o sistema e ti vendes madeira certificada. Máis sobre a certificación en grupo.

O catastro non coincide co que hai no terreo. Pódese arranxar?

Si. Facemos o levantamento topográfico, preparamos a documentación e tramitamos a emenda ou a alteración catastral. Se hai un conflito co estremeiro, tratámolo tamén desde a parte xurídica.

Canto custa?

Depende da superficie, do número de parcelas e do que haxa que facer. Tras coñecer o teu caso presentamos unha proposta por escrito con prezo pechado, e dicímosche se hai algunha axuda pública que cubra parte do traballo.

Contacto

Cóntanos que finca tes e que queres facer con ela

Unhas parcelas herdadas que non sabes nin onde están, un piñeiral que queres vender, unha finca que queres certificar. Escríbenos ou chama, e dicímosche por onde empezar.

Ir ao formulario Chamar ao 982 809 154